सोमबार ०८ कार्तिक २०७८

‘अधिनायकवादी ओलीले आफ्नो पार्टीकालाई त छाडेनन्, अरुलाई के गन्थे’

Kantipur News Nepal

काठमाडौं,


नेपाली काँग्रेसका सभापति शेरबहादुर देउवाले राष्ट्रपति विद्यादेवी भण्डारीले प्रधानमन्त्री केपी शर्मा ओलीको कार्यकर्ता जस्तो भएर काम गरेको आरोप लगाएका छन् । संघीय संसद भवन नयाँ बानेश्वरमा शनिबार विपक्षी गठबन्धनले पत्रकारहरुसँग गरेको अन्तरक्रियामा बोल्दै सभापति देउवाले संविधानको संरक्षक र सबैको साझा अभिभावकको रुपमा संविधानले निर्दिष्ट गरेको भूमिका निर्वाह नगरेर राष्ट्रपति भण्डारीले प्रधानमन्त्री ओलीको कार्यकर्ता जसरी काम गरेको आरोप लगाएका हुन् ।

संसदको कुनै पनि सांसदले बहुमत प्राप्त गर्न सक्ने आधार प्रस्तुत गरेमा प्रधानमन्त्री हुन सक्ने व्यवस्था संविधानले गरेको उल्लेख गर्दै बहुमत पुराएर प्रस्ताव लैजाँदा पनि राष्ट्रपतिले संविधानको व्यवस्थाअनुसार प्रधानमन्त्री नियुक्त नगरेर ओलीको इसारामा चलेको देउवाको आरोप छ । राष्ट्रपतिले संविधानमा भएको व्यवस्था कार्यान्वयन नगरेकाले आफूहरु संविधानको अन्तिम व्याख्या गर्ने संस्था अदालतसमक्ष पुग्न बाध्य भएको उनको जिकिर छ ।

उनले भने, ‘ बहुमत पुर्याएर ल्याएपछि राष्ट्रपतिले प्रधानमन्त्री नियुक्त गर्नुपर्ने होइन ? उहाँको कर्तव्य थियो नियुक्त गर्नुपथ्र्यो । ओलीको कार्यकर्ता जस्तो गरेर काम गर्न मिल्छ राष्ट्रपतिले ? त्यसकारण अदालतमा मुद्दा हालेको । संविधानको व्याख्या गर्ने अन्तिम स्थान भनेको अदालत हो । अदालतले संविधानको रक्षा पनि गर्छ ।’

सभापति देउवाले प्रधानमन्त्री ओली अधिनायकवादी भएको पनि आरोप लगाए । अधिनायकवादी र सर्वसत्तावादी शैलीका ओलीले आफ्नै पार्टीका नेतालाई पनि बाँकी नराखेको टिप्पणी सभापति देउवाले गरे ।

उनले भने, ‘प्रधानमन्त्री ओली न प्रजातन्त्रवादी हुन्, न त संविधानवादी हुन् । प्रधानमन्त्री ओली अधिनायकवादी हुन् । आफ्नै पार्टीकालाई त छाडेनन् अरुलाई के गन्थे ।’


Last Updated on: June 26th, 2021 at 8:23 pm
१७९ पटक हेरिएको

तपाईको प्रतिक्रिया